DAŠA DRNDIĆ është fituese e bursës për në Rezidencën e Shkrimtarëve dhe Përkthyesve letrarë "TIRANA IN BETWEEN - 2015", organizuar nga POETEKA dhe mbështetur nga TRADUKI, në bashkëpunim me Ministrinë e Kulturës së Republikës së Shqipërisë.
Shkrimtarja kroate do të qëndrojë në Tiranë gjatë muajit nëntor, ku do të realizojë projektin e vet letrar, duke kryer lexime publike, takime, biseda dhe intervista me medien si dhe bashkëpunime me përkthyes në dobi të sjelljes në shqip të romanit të saj "Trieste", i cili do të të botohet së shpejti.
Për lexuesin shqiptar krijimtaria e shkrimtares DAŠA DRNDIĆ bëhet veçanërisht interesante, pasi disa nga ngjarjet në romanin «Sonnenschein» (versioni anglisht dhe italisht «Trieste») ndodhin në Shqipëri, në Sarandë, Vlorë dhe Tiranë, gjatë qeverisjes fashiste të Mussolinit, në Luftën e Dytë botërore.
Gjithashtu, edhe pjesë të romanit «Belladonna», i kushtohen jetës në Shqipëri gjatë sundimit të Enver Hoxhës, në burgjet e Burrelit, ku disa personazhe janë emra të njohur të skenës publike. «Belladonna», si edhe libra të tjerë të mëhershëm të kësaj autoreje, hedh dritë mbi zona ende të errëta e të pa ndriçuara në regjimet jodemokratike, diktatoriale dhe autoritare, por në radhë të parë u kushtohet jetëve e njerëzve që jetuan dhe jetojnë nën represion.
Dasa DRNDIĆ ka botuar libra prozë dhe poezi në revistat letrare në të gjithë ish-Jugosllavinë. Si romanciere, librat e saj janë përkthyer në anglisht, frëngjisht, polonisht, hungarisht, sllovenisht, holandisht, sllovakisht, italisht, maqedonisht, gjermanisht, ndërkohë që pjesë e fragmente të krijimtarisë së saj janë përkthyer edhe në shumë gjuhë të tjera. Aktualisht jeton si shkrimtare e lirë në Rijeka, Kroaci.
